لاہور ۔ این اے123سے پاکستان مسلم لیگ ن کے نامزد امیدوار اور وزیراعلیٰ پنجاب کے سینئر سیاسی معاون محمد پرویز ملک نے کہا ہے کہ فوجی آمرپرویز مشرف نے اپنا اقتدار بچانے کیلئے آئین اورصدرزرداری نے بار بار اپنا وعدہ توڑا۔حکمرانوں کی وعدہ شکنی نے پاکستان کوبند گلی میں پہنچادیا اورعوام کو پرائی دشمنی کی آگ میں جھونک دیاہے۔مسلم لیگ (ن) پاکستان کی سا لمیت ،جمہوریت کی مضبوطی اورمنتخب پارلیمنٹ کی بالادستی کیلئے کوشاں ہے ۔میثاق جمہوریت کی پاسداری سے پاکستان کے متعدد قومی بحرانوں پرقابوپالیا جائے گا،حکمران ہٹ دھرمی چھوڑدیں۔عوام کوجمہوریت کے ثمرات نہ ملے تو تاریخ حکمرانوں سے اس کاضرور جواب مانگے گی ۔این اے123میں مختلف مقامات پر عوامی اجتماعات سے خطاب کرتے ہوئے محمد پرویز ملک نے مزید کہاکہ این اے123 کے عوام کیلئے معیاری تعلیمی اور طبی سہولیات کی فراہمی میرا نصب العین ہے۔ این اے123میں عوام کی سوچ سے زیادہ ترقیاتی کام کراﺅں گا۔انہوں نے کہاکہ مسلم لیگ (ن) اپنے عوام دوست اقدامات اوراعلیٰ کارکردگی کی بنیاد پرعوام سے ووٹ مانگے گی اورکامیابی کے بعد عوام کے مسائل حل کرانے کیلئے کوئی کسر اٹھا نہیں رکھی جائے گی ۔18فروری 2008ءکے عام انتخابات کی طرح ضمنی الیکشن میں بھی عوام شیر کے نشان پر مہر یںلگاکر سیاسی شعبدہ بازوں اورموسمی بٹیروں کومسترد کردیں گے۔انہوں نے کہا کہ مسلم لیگ (ن) کی کامیابی سے این اے123میں ایک نئے دور کاآغاز ہوگا۔میری کامیابی سے قائد انقلاب میاں نوازشریف کے قومی کاز کوتقویت ملے گی ۔ انہوں نے کہا کہ ووٹرز کااعتماد ہمارا سرمایہ افتخار ہے ،انہیں مایوس نہیں ہونے دیں گے۔