پاکستان مسلم لیگ (ن) کے بین الاقوامی امور کے سیکرٹری جنرل اور جاپان کے صدر شیخ قیصر محمود نے کہا ہے کہ ججز کی تقرری کے حوالے سے صدر آصف زرداری نے شاہی فرمان جاری کرکے آئین کی دھجیاں بکھیر دی ہیں،انہوں نے کہا کہ پوری قوم جانتی ہے کہ ججز کی تقرری آئین کے مطابق چیف جسٹس آف پاکستان کی سفارشات کے بغیر نہیں ہوسکتی ،لیکن صدر آصف زرداری نے عدلیہ پر شب خون مارتے ہوئے ججز کی تقرری کے حوالے سے فرمان جاری کرکے آمریت کی ےاد تازہ کردی ہے،ان کا کہنا ہے کہ پیپلز پارٹی سے آزاد عدلیہ ہضم نہیں ہو پارہی جمہوریت کے لبادے میں آمرانہ اقدام کرکے ریاستی اداروں کو ایک دوسرے کے سامنے لا کھڑا کیا گیا ہے۔ شیخ قیصر محمود نے کہا کہ تمام اوورسیز پاکستانی صدر آصف زرداری کے اس آمرانہ اقدام پر سخت تشویش ہے اور وہ اس کی شدید مزمت کرتے ہیں ، انہوں نے کہا کہ مسلم لیگ (ن) نے جمہوریت کی بقاءکے لیے بہت جدوجہد کی ہے بغیر کسی مفاد کے ملک وقوم کی خاطر اورجمہوریت کے استحکام کے لیے حکومت کا بھرپور ساتھ دیا ،مگر آصف زرداری پرویز مشرف کے اصولوں پر چل کر خود جمہوریت کو تباہ کرنے کی سازشیں کررہے ہیں،اور اب ان کا انجام مشرف سے بھی برا ہوگا۔