لاہور۔ پاکستان مسلم لیگ ن کے مرکزی رہنما اور این اے123سے نامزد امیدوار محمد پرویز ملک نے کہا ہے کہ حافظ سلمان بٹ محض چند ووٹوں کیلئے گورنر پنجاب سلمان تاثیر کی جھولی میں بیٹھ گئے لیکن پیپلزپارٹی کے سینئرصوبائی وزیر راجہ ریاض نے ان کی امیدوں پرپانی پھیردیاہے۔عوام نظریہ ضرورت کے تحت یااپنے مفادات کیلئے وفاداریاں یااپنا سیاسی عقیدہ تبدیل کرنے والے سیاستدانوں کوپسند نہیں کرتے۔مسلم لیگ ن ایک معتدل جماعت ہے، عوام ووٹ کی طاقت سے سیاسی انتہا پسندو ں کاراستہ روک دیں۔ ہمیں دوسروں کی پگڑیاں اچھالنا پسند نہیں ،میرے خلاف حافظ سلمان بٹ کابے بنیاد پروپیگنڈا حسد اورتعصب کی بدترین مثال ہے۔پیپلزپارٹی کے سینئر صوبائی وزیرراجہ ریاض کی طرف سے اپنی حمایت کاخیرمقدم کرتا ہوں۔شیخ رشید کی شکست فاش سے حافظ سلمان بٹ سمیت دوسرے امیدواروں کوسبق سیکھناچاہئے ۔وہ یونین کونسل18 میں ایک بڑے جلسہ سے خطاب کررہے تھے۔صوبائی وزیر میاں مجتبیٰ شجاع الرحمن،وزیراعلیٰ پنجاب کے معاون خصوصی وممبرقومی اسمبلی ملک محمدافضل کھوکھر ،ارکان پنجاب اسمبلی چودھری شہبازاحمد اوروسیم قادر اورباﺅاختر نے بھی خطاب کیا ۔محمد پرویز ملک نے مزید کہا کہ ہم پرسرکاری مشینری اوروسائل استعمال کرنے کا الزام جھوٹ کاپلندہ اور شکست ماننے والی بات ہے،تاہم بغیر ٹھوس ثبوت کے الزام کی کوئی حیثیت نہیں ہوتی ۔مایوس عناصر کی طرف سے بوکھلاہٹ میں اس قسم کی افواہیں پھیلانے کاپرانارواج ہے۔انہوں نے کہا کہ این اے123کے عوام میاں نوازشریف کے جمہوری افکار اورسیاسی کردارکی بنیاد پر مجھے ووٹ دیں گے۔مسلم لیگ  ن کاشیر عوام پرظلم اوران کااستحصال کرنے والے عناصر کوماربھگائے گا۔