لاہور۔ پاکستان مسلم لیگ ن چنیوٹ کے صدر میاں علی ممتاز نے کہا ہے کہ میاں نوازشریف نے پاکستان کے قومی مفادات پرکمپرومائز کیانہ حکمرانوں کوکرنے دیں گے۔حکمران عوام کے بنیادی انسانی حقوق اور قومی مفادات کی حفاظت کرنے سے قاصر ہیں ۔پاکستان کااقتداراعلیٰ ایک سوالیہ نشان بن کررہ گیا ہے۔حکمران بیرونی دباﺅمیں آکرمسلسل متنازعہ اور کمزورفیصلے کرتے چلے جارہے ہیں۔اگر حکمرانوں کوروکانہ گیا توپاکستان کے قومی اداروںکوتباہ کر دیں گے۔اپنے ایک بیان میں میاں علی ممتاز نے مزید کہاکہ چودھری پرویزالٰہی کاحالیہ بیان چورمچائے شورکے مصداق ہے ،ان کے دور میں جب دکانوں سے آٹا غائب تھا اورکسی کوچینی تک نہیں ملتی تھی اس وقت انہوں نے عوام کو ایساکرنے کی ترغیب کیوں نہیں دی ۔خواتین کی سینیٹ ،اسمبلیوںاوربلدیاتی اداروں میں 30فیصد نمائندگی بارے قاف لیگ والے فوجی آمر کے اقدام کاکریڈٹ نہیں لے سکتے ۔انہوں نے کہا کہ پرویزالٰہی دروغ گوئی میں اپنا ثانی نہیں رکھتے ۔ایک طرف تو چودھری برادران نے کئی بار فوجی آمر پرویز مشرف کے ساتھ لاتعلقی کااعلان کیاہے اوردوسری طرف وہ اس کے اقدامات کاڈھنڈورا پیٹ رہے ہیں۔انہوں نے کہا کہ گجرات سے قاف لیگ ایک بار پھر بری طرح ہارے گی اورمسلم لیگ (ن) کانامزد امیدوار بھاری اکثریت سے کامیا ب ہوگا۔قومی سیاست سے قاف لیگ کاکردارختم ہوچکا ہے ،آئندہ عام انتخابات میں بچی کچھی قاف لیگ بھی صاف ہوجائے گی۔