جو سیاستدان آئین کی پاسداری اور عوام کی خدمت نہیں کرسکتے وہ گھر بیٹھ جائیں۔حمزہ شہباز
جس نے اپنے منصب سے انصاف نہ کیا عوام اسے سیاست بدرکردیں گے۔سعد رفیق
ترقیاتی فنڈز عوام کی امانت ہوتے ہیں ، خیانت نہیں ہونے دوں گا۔پرویزملک
 
 لاہور۔ پاکستان مسلم لیگ (ن) کے مرکزی رہنماﺅں میاں حمزہ شہباز، خواجہ سعد رفیق اوراین اے 123سے نامزد امیدوار محمد پرویزملک نے کہا ہے کہ جو حکمران یا سیاستدان آئین کی پاسداری اور عوام کی خدمت نہیں کرسکتے وہ گھر چلے جائیں۔نوزائیدہ جمہوریت اورپاکستان کی کمزور معیشت ان کابوجھ مزیدبرداشت نہیں کرسکتی۔عوام نے جن وعدوں اوربلند بانگ دعوﺅں کی بنیاد پرپیپلزپارٹی کووفاق میں حکومت بنانے کامینڈیٹ دیا تھااگر وہ پورے نہ ہوئے تووہ اٹھ کھڑے ہوں گے۔جونڈرلوگ وردی والے سے نہیں ڈرے وہ سوٹ ٹائی والے سے بھی خوفزدہ نہیں ہوںگے۔اب سیاست میں صرف اس کوپذیرائی ملے گی جوعوام کی محرومیاں دوراوران کے ساتھ انصاف کرے گا۔عوام کو زندگی کی بنیادی ضرویارت اورسہولیات فراہم کرنے کے ساتھ ساتھ انہیںمسائل کی تیزدھوپ سے بچانااصل سیاست ہے۔ مسلم لیگ (ن) اورعوام ایک دوسرے کے ساتھ خلوص اور اعتماد کی ڈور سے بندھے ہیں،یہ تعلق ہماری طاقت ہے۔ارکان قومی وصوبائی اسمبلی سردارایازصادق ،میاں مرغوب احمد ،شکیل اعوان،میاں نویدانجم،وسیم قادر،محسن لطیف ،راحیلہ خادم حسین باﺅاختراوردوسرے مقررین نے بھی خطاب کیا۔
 میاں حمزہ شہبازنے مزید کہا کہ حکمران اپنے کندھوں پر سترہویں ترمیم کا بوجھ اٹھاکرزیادہ دور تک نہیں چل سکتے ۔سترہویں ترمیم کاجراثیم نوزائیدہ جمہوریت کیلئے کینسر کی طرح مہلک ہے۔انہوں نے کہا کہ حکمرانوں نے سترہویں ترمیم کی صورت میں فوجی آمر کی باقیات کواپنے سینے سے لگارکھا ہے ۔اگرحکمران آئینی مدت پوری کرناچاہتے ہیں توانہیں صدق دل سے میثاق جمہوریت کی پاسداری کرناہوگی ۔انہوں نے کہا کہ میاں نوازشریف اوران کے سپاہی حکمرانوں کومیثاق جمہوریت اوراپنے وعدوں سے راہ فراراختیار نہیں کرنے دیں گے۔
 خواجہ سعد رفیق نے مزید کہا کہ جس نے اپنے منصب سے انصاف اور اختیارات ہوتے ہوئے بھی ملک وقوم کوڈیلیور نہ کیا عوام اسے سیاست بدرکردیں گے۔صدرزرداری آئینی بحران ختم ہونے تک پارلیمنٹ میں آنے کی زحمت نہیں کریں،اب ان کے پاس مزید بہانے بازی کی گنجائش نہیں ہے۔انہوں نے کہا کہ حکمرانوں کو آئین وقانون کاپابندکرنے ،جمہوریت پرعوام کااعتماد برقراررکھنے اورپاکستان کااقتداراعلیٰ بچانے کیلئے دائیں بازوسے تعلق رکھنے والی جمہوری قوتوں کے درمیان اتحاد ناگزیرہوگیا ہے۔
 پرویز ملک نے مزیدکہا کہ ترقیاتی فنڈز عوام کی امانت ہوتے ہیں ، خیانت نہیں ہونے دوں گا۔کل ٹیلی ویژن کی آوازاورٹیلیفون کی گھنٹی بند ہوجائے گی۔این اے123کے عوام تبدیلی اورتعمیر وترقی کیلئے شیر پرمہریں لگائیں اورلال مسجد میں خون کی ہولی کھیلنے والی قاف لیگ کے بغل بچہ حافظ سلمان بٹ کے ساتھ ساتھ حمایت اسلام میں مالی غبن کرنے والے کومسترد کردیں۔ مسلم لیگ (ن) کی قیادت کی قومی خدمات کوفراموش نہیں کیا جاسکتا،عوام ہمارے کردارکی بنیاد پرہمیں ووٹ دیں گے۔