لاہور ۔ پاکستا ن مسلم لیگ ن اوورسیز کے مرکزی سیکرٹری جنرل شیخ قیصرمحمود نے کہا ہے کہ میاں نوازشریف پرعمران خان کی بیجا تنقید چھوٹامنہ بڑی بات کے زمرے میں آتی ہے۔فوجی آمر پرویز مشرف کی گود میں بیٹھ کروزارت عظمیٰ کاخواب دیکھنے اور وردی پوش صدارت کے حق میں ریفرنڈم کی انتخابی مہم چلانے والے عمران خان سیاست میں  رن آﺅٹ  ہوجاتے اگر مسلم لیگ ن جذبہ خیرسگالی کے طورپر ان کی مددنہ کرتی۔پاکستان کے باشعور طبقات میں عمران خان کی باتوں کوسنجیدگی سے نہیں لیا جاتا،این اے55کے انتخابات میں تحریک انصاف پرووٹرز کاعدم اعتماد اس بات کازندہ ثبوت ہے۔اپنے ایک بیان میں شیخ قیصرمحمود نے مزید کہا کہ اگر ہم نے عمران خان کوآئینہ دکھایاتووہ سیاست کے میدان سے بھاگ جائیں گے۔آئندہ ہونیوالے عام انتخابات کے بعد تحریک انصاف کانام ونشان تک مٹ جائے گا۔انہوں نے کہا کہ اگرعمران خان میں دم خم ہوتا تووہ این اے55یااین اے123سے خود الیکشن لڑتے ،لیکن انہوں نے اپنے کارکنوں کوقربانی کابکرا بنایا۔عمران خان کسی نہ کسی طرح میڈیا میں ان رہناچاہتے ہیں لیکن انہیں اپنے اس فضول شوق کیلئے قومی قیادت پرانگلیاں اٹھانے کی اجازت نہیں دی جاسکتی۔انہوں نے کہا کہ عمران خان تحریک انصاف میں ناکام سیاستدانوں کااتوازبازار لگاکر ملک میں اپنی سوچ کے مطابق کوئی تبدیلی نہیں لاسکتے۔ تحریک انصاف کاڈاﺅن فال عمران خان کے ون مین شواورآمرانہ اندازسیاست کانتیجہ ہے۔انہوں نے کہا کہ تحریک انصاف میں مشاورت کاکوئی تصورنہیں ،عمران خان اورپرویز مشرف کی سوچ اوران کے رویوں میں کوئی فرق نہیںہے۔