چنیوٹ(نمائندہ خصوصی) پاکستان مسلم لیگ ن چنیوٹ کے صدر میاں علی ممتاز نے کہا ہے کہ وفاقی حکومت دہشت گردی کی روک تھام کیلئے سنجیدگی کامظاہرہ کرے۔ عوام کو بھوک اوربدامنی کی آگ میں جلتاچھوڑ کرحکمران اپنا اقتداربچانے میں مصروف ہیں،ان کایہ رویہ افسوسناک ہے ۔ملک وقوم کو شدت پسندوں کے رحم وکرم پرکیوںچھوڑدیا گیا ہے ۔ملک میں بم دھماکے اورخود کش حملے روزکامعمول بنتے جارہے ہیں۔عوام کب تک اپنے پیاروں کے جنازے اٹھا تے رہیں گے۔حکمرانوں کواپنے عوام کی حالت زارپرترس کیوں نہیں آتا۔اپنے ایک بیان میں میاں علی ممتاز نے مزید کہا کہ اگر حکمران عوام کوانتہا پسندوں کے ہاتھوں بے موت مارے جانے سے نہیں بچاسکتے تو پھر اقتدار سے مستعفی ہوجائیں۔مسلم لیگ (ن) بیگناہ عوام کے قتل عام پر خاموش نہیں رہ سکتی ۔انہوں نے کہا کہ اگر اب بھی اہم فیصلے کرتے وقت منتخب پارلیمنٹ کوبائی پاس کیا جاتا رہا توملک میں سیاسی وآئینی بحران پیدا ہوتے رہیں گے ۔اگر چاروں صوبوں کے عوام کوایک پلیٹ فارم پرمتحد کرلیا جائے تو ملک کوانتہاپسندی کے ناسور سے پاک کیا جاسکتا ہے ۔انہوں نے کہا کہ مسلم لیگ (ن) کے قائد میاں نوازشریف اوروزیراعلیٰ پنجاب میاں شہبازشریف اعتدال پسندی کے قائل اورحامی ہیں۔ملک سے انتہا پسندی ختم کرنے کیلئے اعتدال پسندی اورقومی یکجہتی کو فروغ دیا جائے ۔انہوں نے کہا کہ مہنگائی نے عام آدمی کوزندہ درگور کردیا ہے ،اس کے باوجودانہیں زندگی کی بنیادی ضروریات تک دستیاب نہیں ہیں۔پنجاب حکومت چینی کے بحران پرقابوپانے کیلئے کوشاں ہے ۔